Ашууларда жол ачык. Министрлик унаа дөңгөлөктөрүн кышкыга алмаштырууга чакырат

Бүгүн, 3-ноябрга карата өлкөнүн ашуулары менен жолдорунда жол ачык, каттам бар.

Транспорт жана коммуникациялар министрлигине караган Жол тейлөө ишканаларынын кызматкерлери зарыл учурларда тазалоо, инерттик материалдарды чачуу иштерин жүргүзүп жатышат.

Министрлик өлкөдө күтүлүп жаткан туруксуз аба ырайына жана 2025-2026-жылдын күз-кыш мезгилине карата жүргүзүлгөн даярдык иштерине байланыштуу тоолуу аймактар жана ашуулар аркылуу жол тарта турган айдоочуларды унаа дөңгөлөктөрүн жайкыдан кышкыга алмаштырып алууга чакырат.

Белгилей кетсек, Кыргызгидромет кызматы 4-5-ноябрь күндөрү аба ырайы кескин өзгөрүп, көпчүлүк аймактарда жаан, бийик тоолуу райондордо кар жаашы күтүлөрүн эскерткен.

Транспорт жана коммуникациялар министрлигинин маалымат кызматы