Транспорт министри Нарын — Баетов унаа жолун текшерди

2-октябрда Транспорт жана коммуникациялар министри Абсаттар Сыргабаев Нарын облусуна болгон иш сапарынын жүрүшүндө Нарын — Баетов унаа жолуна барды.

 

Министр аталган унаа жолдо аткарылып жаткан жумуштар менен жеринен таанышкан учурда унаа жолдун 115-120-чакырым аралыгына 2,7 км бир тараптуу асфальт төшөлгөнү жана жер жумуштары жүрүп жатканы тууралуу маалымат берилди.

 

Ошондой эле Сыргабаев Нарын — Баетов унаа жолунун 33-38-чакырымына барып, тоонун бооруна салына турчу 5 чакырым жол менен 72 метр көпүрөнүн курулушунун даярдыгын текшерди.

Белгилей кетсек, Нарын — Баетов унаа жолун капиталдык оңдоо иштери 2025-жылы аяктайт. Жол 2 тилкелүү 10 тонна жүккө ылайыкталып салынууда.

 

Нарын — Баетов унаа жолунун жалпы узундугу 120 чакырымды түзөт. Анын 36 чакырымын оңдоо каралган.

 

Жол куруу иштерин «Кыргызавтожол» мамлекеттик ишканасынын № 1 Жол курулуш башкармалыгынын кызматкерлери атайын тартылган техникалар менен аткарышууда.

 

 

Транспорт жана коммуникациялар министрлигинин маалымат кызматы