Селдин кесепеттерин жоюу иштери кызуу жүрүүдө

Нөшөрлөп жааган жамгырдын кесепетинен сел эң көп катталган Ош облусунун Кара-Суу, Алай, Араван, Өзгөн, Ноокат райондору, Баткен облусунун Лейлек, Кадамжай жана башка райондордо жолдорду калыбына келтирүү, тазалоо иштери уланууда.

Учурда Жалал-Абад-Казарман (63-98-чакырымдар аралыгы),  Ноокат-Араван (9-чакырымы), Мырзаке-Кара-Шоро (49-51-чакырымдар аралыгы) унаа жолдору убактылуу жабык. Жеринде аймакты тейлеген жолчулар жана атайын техникалар иштеп жатат.

Ошондой эле, Ак-Терек-Папан-Кожокелең (1-чакырымы), Ош-Төлөйкөн (7,4 жана 8,5-чакырымы), Топ-Жаңгак-Кара-Суу, Тамаша-Кызыл-Булак (7 жана 16-17-чакырымдар аралыгы), Бишкек-Ош (660-чакырымы), Ош-Баткен-Раззаков  (63 жана 57-58-чакырымдар аралыгы), Ош-Сары-Таш-Эркештам (42-44-чакырымдар аралыгы) жана башка сел жүргөн унаа жолдор тазаланып, каттам берилди. Азыркы тапта бир тараптуу болгон жолдорду кеңейтүү, суу жеп кеткен тилкелерди калыбына келтирүү иштери жүрүүдө.

Белгилей кетсек, аба ырайынын өзгөрүшүнөн улам 13-17-июль күндөрү өлкөнүн тоолуу жана тоо этектериндеги райондордо сел жүрүп, дарыяларда суунун деңгээли көтөрүлүшү мүмкүндүгү маалымдалган. Мындан улам Транспорт жана коммуникациялар министрлигине караштуу Жол тейлөө ишканалары өздөрүнө бөлүнгөн аймакты толук көзөмөлдөп, жаралган кырдаалга ыкчам аракет көрүү үстүндө.

Транспорт жана коммуникациялар министрлигинин маалымат кызматы