Ош-Сары-Таш-Эркечтам унаа жолу: Ашуулардагы абал

Ош-Сары-Таш-Эркечтам унаа жолунун Тоң-Мурун ашуусунда жол көрүнбөй, катуу бороон болууда. Аймакты караган #960 Жол тейлөө ишканасынын кызматкерлери атайын техникалардын жардамы менен тазалоо иштерин аткарып жатышат. Каттам бар.

Ал эми 7-март күнү саат 22:30дар чамасында Ош-Сары-Таш-Эркечтам унаа жолунун 171-177-чакырымдар аралыгында (Талдык ашуусу) 5 жерден кар көчкү түшүп, каттам үчүн кыйынчылыктар жаралган. Жерине дароо атайын техникалар тартылып, түнкү саат 02:30дар чамасында жол тазаланып, каттам жанданган.

Белгилей кетсек, министрликке караштуу “Кыргызавтожол-Түштүк” жана Кыргызавтожол-Түндүк” мамлекеттик ишканалары тарабынан атайын кезмет уюштурулуп, тазалоо, кум-туз аралашмасын себүү жумуштары бардык аймактарда тынымсыз аткарылып жатат.

Транспорт жана коммуникациялар министрлиги эскертет!

Кандай кырдаал жаралбасын каршы тилкеге чыкпаңыз! Сиз эрежени гана бузбастан, жол тазалаган унаалардын кыймылына катуу тоскоолдук жаратарыңызды унутпаңыз!

Эсиңизде болсун! Унаалар ортосундагы 500 метр аралыкты так сактоо — кырсыкты алдын алып, жол коопсуздугун камсыздайт.

Транспорт жана коммуникациялар министрлигинин маалымат кызматы