Министрдин орун басары Бекназар Базаралиев Кореянын Экспорттук-Импорттук банкынын өкүлдөрү менен жолукту

         Транспорт жана коммуникациялар министринин орун басары Бекназар Базаралиев Түштүк Кореянын Экспорттук-Импорттук Банкынын Ташкенттеги өкүлчүлүгүнүн башчысы Канг Санджин менен жолукту.

         Иш-чарага ошондой эле, Кыргызстандын Түштүк Кореядагы атайын жана ыйгарым укуктуу элчиси Аида Исмаилова жана ведомствонун жооптуу кызматкерлери катышты.

         Жолугушуунун жүрүшүндө жол-транспорт жаатындагы кызматташтыктын актуалдуу маселелери, жол коопсуздугун камсыз кылуу жана мындан аркы кадамдар талкууланды.

         Тараптар министрликтин материалдык-техникалык базасын жакшыртуу багытында Корея мамлекети тарабынан каржылана турган “Кыргыз Республикасына жол куруу техникаларын берүү” долбоорунун техникалык-экономикалык негиздемесин жактыруу маселесин тездетүүнү жана 223 даана жол-курулуш техникасын алуу боюнча сүйлөшүүлөрдү жүргүзүштү. 

         Ошондой эле, “Токтогул суу сактагычынын үстүнөн өтүүчү көпүрө куруу” долбоорун ишке ашыруу боюнча талкуулар жүрдү.

         Жолугушуунун жыйынтыгында, аталган долбоорлорду ишке ашырууну тездетүү үчүн жакын арада Корея тараптан Кыргызстанга баалоо миссиясы келээри маалымдалды.

         Жолугушуу жылуу маанайда, конструктивдүү жагдайда жыйынтыкталды.    

Транспорт жана коммуникациялар министрлигинин маалымат кызматы