Көк-Мойнок-Кубакы жолундагы жол белгилер алмаштырылып, айланасы таштандыдан тазаланды

«Кыргызавтожол-Түндүк» мамлекеттик ишканасынын №955 Жол тейлөө мекемесинин жолчулары тарабынан Көк-Мойнок-Кубакы унаа жолундагы (0-26-чакырымдар аралыгы) эскирген жол белгилерин алмаштыруу менен таштандыларды тазалоо иштери аткарылды.

Анда жолдун 0-26-чакырымдар аралыгында ыргытылган таштандылар жана башка тиричилик калдыктары чогултулду.

Айрыкча Орто-Токой суу сактагычына токтоп, жаратылышка суктанып, башкысы коопсуз жерде сүрөткө түшүү максатында атайын тосмолор тосулган жайдын (фотозона) айланасы таштандыга тез толуп, байма-бай тазаланып турат.

Ошондой эле, таштандыларды тазалоо иштери Бишкек-Нарын-Торугарт унаа жолунун 221-270-чакырымдар аралыгында да аткарылды.  

Мындан улам, Транспорт жана коммуникциялар министрлиги жарандарды табият менен таттуу мамиледе болуп, жолго таштанды таштабоого чакырат.

Транспорт жана коммуникациялар министрлигинин маалымат кызматы